இன்னுமின்னும் நிறைய நிறைய …. எதுவுமே வேண்டாம்!

பசு கலைந்து போன பல்லாங்குழி விளையாட்டு
அறிவியல் நோட்டில் ஆசிரியர் கிழித்த
வரைந்த இதயம்
அறிவில் எட்டாமல் அதகளம் புரிந்த
பூகோளப் படம்
தொட்டு விளையாட்டில் துரத்தித் தொட
முடியாத தோழி
குச்சி ஐஸில் தடவிச் சிலிர்த்த
நாக்கின் சுகம்
தாவணி அக்காக்கள் கிசுகிசுத்த அந்தப்
பேருந்து நிலையம்
தண்ணீர் எடுக்க வந்து போர்க்களமாகும்
அதே குழாயடி
யார் வீட்டிலும் பசிக்கு உண்டு மகிழ்ந்த
சமத்துவ எதார்த்தம்
வயதான தாத்தாமுன் மறைந்து நிற்கும்
வயதாகாத அம்மா
இதுபோலவே இன்னுமின்னும் நிறைய நிறைய …. எதுவுமே வேண்டாம்.
சிட்டுக்குருவியோடு சில்லென்று ஓடித்திரிந்த
கலப்படமில்லா
அந்த நாட்களின் என் மனது தவிர!

– சித்ரா மகேஷ்